Home  |    Artikel  |    News  |    Shop (Bücher/CDs)  |    Forum  |    Links  |    Kontakt  |    Gästebuch
Sie befinden sich hier:  Startseite / News / Seyfo
Lu Camayḏan w Lu Ray-Cam Buyono 3

Kfarze w Mor Cëzoziyel


“Bu Sayfo [1915] këtwo arbco jandërma bi qriṯo. Tre mënne su Danẖëko w tre mënne su Skandarko, su babo d Xori Caziz wayne. Bu zabnano ar rabe di qriṯo hani wayne. Åsamici aẖ ẖadisat d hawën b Mëḏyaḏ. U Danẖo mšayacle xabro lu Skandarko, mërle: D saymat b diḏi, zubţina at tre jandërmayḏan w hat ste zbaţ diḏox! Gëd šuqlina at tfënag manne w quţlinanne. W ëzzan l Ciwardo. U Skandarko lo mţele qim diḏe, lo simalle, omër: Mede layto!


Sahmo rabo maş şuroye azzën l Ciwardo. Hën manne fayiši bë Kfarze. Ag gawre qţilënne. Tre w šawci (72) nafšoṯe ste midënne yasire. Hani las sayyidin mëblënne l Kafsange. Fayiši ak kfarzoye yasire tamo, balki ẖëkëm dë tre-tloṯo yarẖe. Ak kfarzoye d maţënwo l Ciwardo, šamici më zawno be aykone w mërre lë ẖḏoḏe ëmmi: Ay yasiranëk diḏan fayiši b Kafsange w Dermuske. Lo komarfënne w lo mede ... Aydarbo saymina? Čara mede?!

Mšawarre b hën sowe, mašërre aclayye, mërre: Dermuske kit eba arbco bote. Kulle kowan me Be-Sayyid Xalil. Ţaw me d uzzoxu lalyo mede dë mẖalqutu cal Dermuske layt. Bas lo hawxa ëzzoxu! Këbce d uzzexu mo (100) gawre bë tfënag. B caşro-ẖamšaẖşar (10-15) gawre, lë kowe! Gëd faytitu cal Aẖlaẖ, cal Kafsure, cal Kfarze,.... Dlo howutu b quwwa, lë kmaxluşutu.

 

Be lë kosaymutu čara mede, mẖawu cal u ţaršaṯṯe (sawal w qanyone) ste! Amţawu ţarš w kmo nafšoṯo ste yasire men dëṯṯe. I naqlayo gëd maxluşutu at tarte w šawci (72) nafšoṯani.

 

Koqaymi an noše kosaymi ruẖayye kar bë tre-tloṯo yawme. Azzën gab u Mascud Be-Galle Šabo, u rabo d Ciwardo. Šrëẖalle be mën kubci d saymi. Ţlëbbe mene mucawane w mëralle: Ašër d lëzzan lafelayye, gëd quţlënne w gëd saymënne ţaye! U Mascud Be-Galle Šabo hulelën gawre w tfënag omër: De izexu!

 

Koqaymi kuzzën këmẖalqi cal Dermuske. Kozëbţi Dermuske xëd këtyo. Komaydi Cavdo w Amoke i ẖoṯo w i aṯto. At tloṯo kurmanj. I aṯto, i ẖoto d Cavdërraẖmano d Be-Xallo, d Be-Smacilo, u ağa kurmanj dak kfarzoyewa. Kmaydënne qafle d sawal ste w an arbco-ẖamšo (4-5) şuroye d këtwayne tamo ste kamţënne cam ruẖayye. W koṯën l Ciwardo kmaxlëşënne.

 

Më Ciwardo komšayci xabro l Cavdërraẖman d Be-Xallo, kummile: Komţelan ẖoṯox w zbëţlan Cavdo w i ẖoṯo. A tloṯo kanne harke b Ciwardo zbiţe. Komarfat ay yasirayḏan marfiyyënne w lë komarfatte, aẖna gëd quţlina hani w hat ste qţalyo hanëk.

 

U Galo d Be-Qačo cam ay yasire b Kafsange´we. Cëmre ẖşar-traẖşar (10-12) šnewa, ele maẖkele omër: An naqqa amţalallan me Kafsange lë Kfarze d quţlilan. An ağawiye dë Kfarze, mërwaylën tawunne larke. Qralle as sayyidin. Hani latwo mede b iḏayye, aşël an ağawin dë Kfarze wayne.

 

Aṯina lu Gubo das Safrune. Kale bayn lë Kfarze w l Kafsange. Tamo hawxa šalwoyo. Me Kafsange amţelallan lu šalwano lašan d quţlilan. Këtwa ẖa kurmanj kfarzoyo ëšme Usëvke Zurëk, Aloho lo mẖasele. Hano qţiwayle b iḏe ğalabe şuroye. Yatëw qumayna. Maşërallan a tre w šawci (72) nafšoṯe bë ẖḏoḏe. Ḫa bëṯër mu ẖreno. Usëve Zurëk, maẖëtle i tfëngayḏe cal u qamoyo w b kurmanji komër: Gëd ẖozeno i tfëngayḏi kmo manxu gëd xurmo.

 

Bi ẖalaṯe kalan kulan qëm du mawto, cël minayna mi Adro di Qasrëke, Cavdërraẖman mhawarle b kurmanji omër: Usëvko zbaţ iḏox b ruẖox! Amoke w u Cavdo sağne! Gëd mẖalfinanne! D amţat admo mënne, tamo ste gëd quţli Amoke w u Cavdo w ẖoṯi! Usëvko haw majrele d ţoyaq i tfënge. Amţëlallan maslëqallan li adro. Bëṯër aṯina lë Kfarze. Fayišina lalyo-tre hul d huwwe hënnëk w ac ciwarnoye jëwabat lë ẖḏoḏe. Mšayciwa qaweşëd lë ẖḏoḏe. Ac ciwarnoye ţlëbbe maţ ţaye d mawbëli aẖna lu ţuro d Kafsure, mqabël d Ciwardo. Ac ciwarnoye ste gëd manţën Amoke w Cavdo w i aṯto l tamo. Tamo gëd miẖalfina bë ẖḏoḏe.

Azzan mbalallan maslaqallan lu ţurawo. Amţalle Amoke w Cavdo w i ẖoṯo d Cavdërraẖmano a tloṯo. Maslëmënne l Be-Smacilo, lar rabe daţ ţaye dë Kfarze. W at tarte w šawci (72) nafšoṯo maxlaşlan azzan l Ciwardo.”1



 

Bruksal w Mor Cëzoziyel

 

Kito maṯlo hawxa komar: U tarix komadcar ruẖe!

 

B Awruppa la kfarzoye, hënnëk b iḏayye, disa, bu mal w bu jan dëṯṯe, macmarre Mor Cëzoziyel. Ḫšëwwe kalën b Awruppa´ne, Be-Ḫamke, Be-Smacilo w an ağawat ẖrene lo fëšlën! Ma, man me ucdova, gëd maẖraw Mor Cëzoziyel? Alah nošo layt w lo fëšle! Hawxa ẖšëwwe.

 

Usëve Zurëk, ba hawo me zawno kwiš! Aloho lo mẖasele! Ma dis gëd qoyam!? Hano latwe abadan cal bole da kfarzoye.

A kfarzoyo, disa hawxa ẖšowo ğalţo ẖšëwwe. Hënnëk b iḏe d ruẖayye amţalle ağawat he qway me Be-Ḫamke w Be-Smacilo cal riše d ruẖayye. Mtalle i dawla fašist d Suriya. I dawla d Suriya maqëmla disa Usëve Zurëk. Malwašlale qemasto semaqto daẖ ẖasye şuroye. Qobaẖṯo daẖ ẖasye şuroye b qarce. Cëkkasa dar rucye şuroye b iḏe. Mërlalën “Kale u ẖasyaṯxu, u rucyo ţawwo, hanoyo, howe brixo alxu! Dayëm nšaqu iḏe! I bëšto semaqto d kito acle, dayëm maţeculla! Šmacu l xabre! Ax xabrayḏe kulle, mi ruẖo ẖayo qadëštone, lo ţocetu! Hwawulle more ţawwe!” A kfarzoye tam hawxa, xu mede d mir, sëmme.



 

Aẖnone w Aẖwoṯo,

 

Albert Einstein, mërle: I fëkra di cayno dlë kţëcno, u fërqocayḏa zaẖmetër mu fërqoco du aţomyo.

 

Këtlan ğalabe medone d kënne ţabuwat. Hani cal qarcayna hawën bala! Grëšlan ğalabe manne! Komarno “Han naqqa kolozam b maḏco d qudrina moẖina ẖaşe daţ ţabuwatani bi arco”. Hani mënnani? Komarno kobacce šroẖo šan d uḏcinalle me qariwo.

Bi qamayto, kul ẖa d kito acle qemësto semaqto, nošo xëdwoṯanyo, me gab Aloho, lo naẖat! I qobaẖṯo d qarce, aẖ ẖayoţe bi šuqo koẖayţila, me gab Aloho lo naẖito. I cëkkasa d iḏe, mi šuqo kozownila, latyo me gab Aloho! Ax xabre d komar, abadan lanne xabre di ruẖo ẖayo qadëšto! Kulle di minfica d ruẖe w di dawla fašist d Suriya´ne.

Bu mamro w bax xabrani abëc d soyam kul hadomo bi cito greco w šakal l ruẖe. Hawxa dis maşërle a kfarzoye kulle bu ẖawlo. Han naqla aṯyoleyo xi pazda. Bdele koxoraz kul hadomo, kul hadëmto qëm du ẖërmo. Ba ma kmajre romaš qëm du ẖërmo! Haṯe zoriye w diktatoriye daf fašistyo. Ḫaşa di fašistiyaṯe gëd moẖinale bi arco!


 

Camo du Ţuro!

A kfarzoyo yasire kodoran hawar!

Qumu li rağlo!

Kolozam d maxlëşinalle me iḏe d Usëve Zurëk!

8 iyyar 2010

 

1 Beṯ-Şawoce Jan, Sayfo b Ţurcabdin 1914-1915, Nsibin 2006, ţboco da 2, f. 212-215.

 


DruckenDrucken | 09-05-2010, 20:30:00 | Admin

Kommentar schreiben
Sie besitzen nicht die Berechtigung, Kommentare abzugeben.







Juli 2014
Mo Di Mi Do Fr Sa So
 30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31  1  2  3